Bon Dru, bon jê Dak Mam, n’qual Krông Nô: Săk du n’hor dak

Ăp bu nuyh ranh Bu Nong ta bon Dru n’kôch, kăl e, bu nuyh tâm bon rêh jŏ năm ta mpeh bơh pĭt Dak Mam, Dak Dru, bon jê Dak Mam (n’qual Krông Nô abaơ).

Ta nau tâm lơh tâm su đah bri dak My n’hanh ka han Prăng, gơi du ma bom n’hanh mô gĕh ka han bu nhŭp n’khĭt, nhŭp bư ka han khăn păng, âk r’năk tâm bon lĕ du tâm ăp ntŏk tâm mpeh bon jê Dak Mil, xă Dak Găn, n’qual Dak Mil rêh. Jêh dơi tâm lơh sŏk lơi bri dak bu pit, bu nuyh bon lan plâ sĭt ta Dak Mam, Dru gơi rêh n’hanh joi kăp wăng sa, ndâk njêng tay bon ơm. Gơi oh mon kon sau, bon lan kah gĭt tô tơm neh ntu tă rêh nĕ bu ranh bon n’hanh bu nuyh bon lan lĕ sŏk săk Dak Dru gơi moh săk bon jêng bon Dru kơt abaơ.

Bon Dru gĕh lơ 150 r’năk n’hanh 850 bu nuyh, tâm nĕ Bu Nong rêh gĕh tâm 85%. Bu nuyh tâm bon tăm ăp ntil tơm gĕh ca phê, tiêu, điều n’hanh chiă rong ndrôk rpu, sur iăr gơi bư hao nau wăng sa, gĕh n’sĭt du huê bu nuyh kan tât 25 r’keh prăk du năm.

Bu nuyh bon lan tâm bon tăm ba lŏ 2 yăn du năm

Bu nuyh Bu Nong ta bon Dru gĕh lơ 120 hec ta tơm ca phê lĕ gĕh play

Bu nuyh bon lan bon Dru tâm rom gop, lĕ n’hâm suan pah kan ndâk njêng bon lan mhe yor xă ndâk kan

Kon se bu nong iê bu nuyh dơi khăm, săm nau ji đah Sam bŭt n’kar săk Y tế

Yor nsrôih pah kan bư hao nau wăng sa, âk r’năk lĕ trŭnh nau o-ach, ndâk bư ngih wâl têh uĕh

Y Sơn